Section 156

156. (1) Bothati jo bo rwalang maikarabelo a molao wa lephata la ditshelete bo ka, mo kananyong ya tirisanommogo ya motho mo patlisisong kgotsa mo ditsamaisong tse di amanang le boitshwaro jo bo tlolang kgotsa jo bo ka tlolang molao oo, bo tsena mo tumalanong ya kutlwelobotlhoko le motho, e e ka tlamelang ka gore bothati jo bo rwalang maikarabelo bo ikana go se pateletse kotlhao ya tsamaiso mo mothong mabapi le boitshwaro.

(2) Tumalano ya kutlwelobotlhoko le motho e ka tlamela ka gore tumalano e diragatswa gape go—

(a) batho ba ba tsepamisitsweng mo tirelong ya, kgotsa go direng mo boemong jwa, motho; kgotsa

(b) badirisani ba ba tsepamisitsweng le batsalani ba motho.

(3) Bothati jo bo rwalang maikarabelo bo ka se tsene mo tumalanong ya kutlwelobotlhoko le motho ntle le fa bo kgotsofetse gore go matshwanedi go dira jalo, ka go ela tlhoko, magareng ga merero e mengwe—

(a) tlholego le ditlamorago tsa tlolo e e kaiwang;

(b) tlholego le bogolo jwa botsayakarolo jwa motho mo tlolong; le

(c) bogolo jwa tirisanommogo ya motho.

(4) Bothati jo bo rwalang maikarabelo jo bo tsenang mo tumalanong bo tshwanetse go e phasalatsa ntle le fa bothati jo bo rwalang maikarabelo bo tlhomamisa gore phasalatso e ka—

(a) tlhola kotsi e e sa siamang mo tshireletsegong ya motho; kgotsa

(b) gobelela patlisiso go tlolo ya molao.

(5) Bothati jo bo rwalang maikarabelo jo bo tsenang mo tumalanong ya kutlwelobotlhoko bo ka, ka kitsiso go motho yo bo dirileng tumalano nae, khutlisa tumalano—

(a) fa motho a dumela;

(b) fa motho a neetse bothati jo bo rwalang maikarabelo tshedimosetso e e fosagetseng kgotsa e e timetsang mabapi le go tsena mo tumalanong;

(c) fa motho a paletswe ke go ikamanya le tumalano; kgotsa

(d) mo mabakeng a a tsepamisitsweng mo tumalanong.

## KGAOLO 11

## BENG BA BA BOTLHOKWA

## Karolo 1

## Beng ba ba botlhokwa

## Beng ba ba botlhokwa